為何會眼乾？
眼乾呢個狀況，其實對於好多都市人嚟講，係常見嘅一個眼睛太過操勞嘅表徵。
其實呢，我哋淚腺天然生產嘅淚水，係要靠我哋眨眼呢個動作將佢平均分佈喺眼睛表面去滋潤角膜表層嘅細胞，但係當我哋金睛火眼咁睇住個大市呀、電腦呀、 國際關係嘅時候，眨眼嘅頻率就會不其然減少，淚水亦都冇辦法平均分佈去滋養我哋角膜表面，大部分唔係真正乾眼症嘅人嘅眼乾狀態其實係呢種，係身體話畀你聽你眼睛唔舒服嘅一個信號。
乾眼症的成因
至於臨床上真正嘅乾眼症，要理解成因就首先要知道我哋角膜表面嘅淚水層嘅成分。淚水層其實有三層: 最近空氣嘅係油脂層，中間係水性層，最貼住角膜表皮細胞嘅係黏液層，三層都好重要，缺一不可，如果因為任何原因，水分分泌不足，又或者水分蒸發得快太快，就會導致真正嘅乾眼症。
乾眼症的症狀
眼紅，視力模糊，有刺痛、燃燒、外物刮眼感覺，覺得光線有較嚴重刺激眼睛感覺，都係乾眼症嘅症狀。
乾眼症6大症狀自我評估：
| 症狀 | 有 | 沒有 | |
| 1 | 眼紅 | ||
| 2 | 視力模糊 | ||
| 3 | 刺痛 | ||
| 4 | 燃燒 | ||
| 5 | 外物刮眼 | ||
| 6 | 覺得光線有較嚴重刺激眼睛感覺 |
乾眼症的類別
大致可以分為:
淚水分泌不足型的乾眼症
導致淚水分泌下降的原因有很多，一般50歲以上，特別是女性的淚水分泌會減少，早期的激光矯視手術(Lasik)，又或者長期配戴不適合的隱形眼鏡可以導致的角膜神經受損或者角膜敏感度下降，一些自身免疫力狀況例如紅斑狼瘡、類風濕關節炎，不同藥物的使用例如: 荷爾蒙替代療法，某些降血壓藥，避孕藥，缺乏維他命A，這種種因素均可導致淚水分泌下降。
淚水蒸發太快的乾眼症
其中一大類型係瞼板腺功能障礙 (MGC, Meibomian gland dysfunction) 即係眼臉內分泌油脂的腺體阻塞，直接導致淚水油脂層分泌失衡嘅狀況，通常有這類狀況的人都會有一啲皮膚狀況，例如玫瑰痤瘡。另外有眼皮問題例如眼皮外翻， 眨眼頻率因為工作或者柏金遜病特別減少，又或者環境中煙、 塵埃、或其他原因導致眼睛敏感狀況，都會有淚水蒸發太快嘅狀況。
舒緩眼睛乾及乾眼症的治療方法
首先要定時休息雙眼，眨眼幫助淚水分佈滋潤角膜，每次洗完面都要保濕眼睛周圍嘅皮膚，間唔中暖敷並按摩眼簾，暢通淚水油脂分泌腺，都可以舒緩輕度嘅乾眼。但做咗以上嘅方法都冇改善，就要搵視光師或者眼科醫生檢查，搵出背後原因對症下藥。
如何預防乾眼症？/ 乾眼症的注意事項
重要事情講三次: 休息眨眼、休息眨眼、休息眨眼，減少暴露於煙塵環境，室內可以考慮放置放濕機，避免冷氣風口直接吹住眼睛部位，有啲研究認為適度攝取omega-3，又或者中醫針灸治療都有啲舒緩作用。
Reference:
https://www.mayoclinic.org/diseases-conditions/dry-eyes/symptoms-causes/syc-20371863
https://www.nei.nih.gov/learn-about-eye-health/eye-conditions-and-diseases/dry-eye
